Volgens Artikels

Deur Essie Bester

Alle ondernemings moet soms negatiewe terugvoer vanaf kliënte hanteer. Of dit nou geregverdig is of nie, is nie so belangrik nie. Wat saak maak, is hoe daar gereageer word op die negatiewe terugvoer en of die kritiek konstruktief aangewend word om foute reg te stel en toekomstige groei aan te wakker.

Jy kan groei in jou maatskappy bewerkstellig as jy op die regte manier reageer op terugvoer deur ʼn bereidwilligheid vir verandering te toon terwyl moeite gedoen word om nie jou gehoor te vervreem nie.

Dit is egter nie altyd so maklik nie – kritiek ontlok gewoonlik sterk emosies en ʼn  verdedigende houding. ʼn Paar suksesvolle entrepreneurs deel hul beste wenke oor hoe om negatiewe terugvoer met grasie te hanteer.

  • Koel af voordat jy reageer

Die belangrikste reël is om dit nie persoonlik op te neem nie, sê Jared Weitz, ʼn New Yorkse entrepreneur en uitvoerende hoof van United Capital Source Inc.

Weitz, wat klein ondernemings help om uit te brei en hul hoogste potensiaal te bereik, sê dat wanneer jy voor negatiewe terugvoer te staan kom, jy moet nadink oor hoe jy dit kan gebruik om te verbeter.

“Met só ’n benadering word die gesprek onmiddellik gerig op die oplossing van probleme in teenstelling met die bou van konflik.”

  • Plaas jouself in die ander persoon se skoene

“Dit is belangrik om jouself in die skoene van die ander persoon te sien,” voeg die Amerikaner Matthew Capala (ʼn ervare digitale bemarkingsbestuurder) by. Probeer om die kwessie – ongeag of dit jou verskoning, jou geestesingesteldheid en/of jou vooroordele is – vanuit die ander persoon se oogpunt te sien.

Volgens Capala is negatiewe terugvoer vir beide die ontvanger en die gewer net so belangrik soos positiewe terugvoer. Terugvoerlusse is een van die sleutel-elemente van ʼn doeltreffende span. “Skep afstand tussen jou emosies en wat die persoon sê en wees objektief wanneer jy terugvoer ontvang.”

  • Aanvaar verantwoordelikheid

Dis belangrik om, wanneer jy kritiek hanteer, nooit die skuld op iemand anders te pak of verskonings te maak nie – selfs al is dit ʼn kwessie waarvoor jy en jou organisasie nie heeltemal verantwoordelik is nie, meen Zach Binder, ʼn gerekende Kaliforniese entrepreneur, bemarker en konsultant.

“Aanvaar eerder verantwoordelikheid en verduidelik hoe jy dit wat verkeerd is, gaan regstel. Om die skuld elders te probeer plaas, sal sake net vererger.”

  • Evalueer jouself en jou proses

As jy negatiewe terugvoering ontvang, is dit belangrik om die oorsaak van die probleem te evalueer – of dit nou ‘n persoonlike saak is (bv. tydsbestuur) of as gevolg van ʼn ondoeltreffende proses.

Deur eerstens die oorsaak van die probleem te bepaal, kan jy die probleem wat onder jou aandag gebring word doeltreffender aanpak en voorkom dat dit in die toekoms herhaal.

  • Vra vir meer besonderhede

Dis nie altyd so maklik om by die oorsaak van die probleem uit te kom nie, sê Bryce Welker, uitvoerende hoof van Crush Empire.

“Soms is daar net nie genoeg inligting om mee te werk nie.” Om hierdie situasie te vermy, doen Welker sy bes om aktief te reageer op enige negatiewe terugvoer wat sy organisasie ontvang deur die persoon wat kritiek lewer om meer besonderhede te vra.

Dit help om ‘n duideliker beeld van die saak te skep sodat beide die onderneming en die persoon wat die negatiewe terugvoer gegee het, in die toekoms op meer produktiewe interaksies kan fokus.

  • Hanteer alle terugvoer soos ‘n geskenk

As iemand aan jou terugvoer gee, negatief of andersins, kan dit jou net help, meen Jaime Manteiga, ’n Kubaans-Amerikaanse tegnologie-entrepreneur en lid van die Forbes Raad (ʼn gemeenskap vir uitvoerende leiers en entrepreneurs in verskillende nywerhede waarvan lidmaatskap slegs op uitnodiging geskied).

Moenie fokus op die onsensitiewe lewering daarvan en/of op jou persoonlike opinie van die persoon wat jou kritiseer nie. Vra raad oor hoe jy beter kan doen. Moet dan nie vergeet om op te volg en aan te toon hoe jy die aangemelde probleem reggestel het nie. Sodoende bewys jy dat jy die volwassenheid het om jou foute reg te stel en so ook bereid is om te verbeter.

Bronne:

https://www.inc.com/young-entrepreneur-council/handle-negative-feedback-like-a-pro-6-expert-tips.html

https://medium.com/@zbignevgecis/8-tips-how-to-handle-negative-customer-feedback-3014811c0aec

Teken aan

Registreer

Wagwoord vergeet

Kitssoektog