Volgens Artikels

Deur Essie Bester

Of jy nou wil vra vir ʼn verhoging of ʼn goeie prys vir ʼn nuwe motor of jouself wil bemagtig om onderhandelingsvaardighede in jou beroep te bemeester – jy kán die skaal in jou guns laat swaai.

Baie mense glo dat onderhandelinge noodgedwonge uitloop op ’n alles-of-niks-situasie en dat daar ʼn wenner en ʼn verloorder moet wees. Niks is egter verder van die waarheid nie.

Alhoewel die doel van onderhandeling beslis is om te kry wat jy wil hê, is dit ʼn feit dat die beste ooreenkomste (dié wat hou) die terme en idees van albei partye insluit, reken Solidariteit se Gilde vir Kommunikasie en Bemarking.

  • Wees spesifiek

Soms verwag ons om te kry presies wat ons wil hê sonder om duidelik te wees oor wat dit is wat ons wil hê. Jy kan nie van ander verwag om jou gedagtes te lees nie. Maak seker jy weet presies wat jy wil hê en vra duidelik daarvoor.

  • Hou op verskoning vra

Dis ongemaklik en stresvol om vir beter voordele te vra. Boonop vind die meeste van ons dit moeilik om vas te bly staan by dït wat ons so graag wil hê. Kenners sê dis die rede waarom ons verskoning vra vir wat ons wil hê.

Ons verwar die behoefte om verskoning te vra met hoflikheid en skep daardeur die indruk dat ons nie selfversekerd is nie.

Jy kan steeds hoflik en beleef wees sonder om terug te staan. Wees selfversekerd en duidelik oor wat jy wil hê.

  • Maak dit ʼn gesamentlike poging

Onderhandelinge vir beter voordele moet beskou word as ʼn gesamentlike poging tussen twee onafhanklke individue wat ʼn gemeenskaplike doel wil bereik. Dit verleen aan die proses ʼn meer positiewe, minder agressiewe gevoel. Nie jy of die ander party kan immers jul doel bereik sonder die ander nie, dus is daar ʼn sterk aansporing om saam te werk.

Wanneer jy vra vir wat jy wil hê, moet jy vooraf oorweeg wat die ander persoon daardeur kan wen. Gebruik dan hierdie voordele as verkoopspunte om suksesvol te onderhandel. Bestudeer elke moontlike aspek van jou saak vooraf, berei so goed moontlik voor en wees buigbaar – dit kan verseker dat albei partye tevrede wegstap.

  • Doen jou huiswerk

Die verskil tussen ervare en onervare onderhandelaars lê nie soseer by wat rondom die onderhandelingstafel gebeur nie, maar eerder van die voorbereiding wat gedoen word.

Met deeglike voorbereiding sal die onderhandelinge vir jou minder intimiderend wees. Dit dien geen doel om vir ʼn verhoging te vra indien jy nie vooraf nagevors het wat ander individue in jou posisie se gemiddelde vergoeding is of as jy nie kan motiveer hoekom jy ʼn verhoging verdien nie.

As jy duidelikheid het oor jou eie doelwitte en die doelwitte van die persoon waarmee jy onderhandel so goed moontlik probeer visualiseer (sodat jy naastenby kan bepaal wat hy of sy daaruit wil hê), is jou kanse op sukses soveel groter.

  • Besluit vooraf wat jy bereid is om te aanvaar

Sorg dat jy ʼn tweede keuse gereed het vir geval die gewenste resultaat nie moontlik is nie. Indien jy tydens ʼn  werkonderhoud nie die salaris kan kry waarvoor jy vra nie, moet jy weet wat die naasbeste aanbod is wat jy bereid is om te aanvaar.

As jy weet wat jou alternatiewe is, kan jy onderhandel vir ʼn beter uitkoms, en dit help jou ook om te weet wanneer jy eerder die samesprekings moet staak.

  • Hou die onderhandelinge positief

Die gedagte dat die sukses of mislukking van jou onderhandelinge ʼn uitwerking op jou alleen gaan hê, kan veroorsaak dat jy dalk wegskram van onderhandeling. Dink eerder daaraan in terme van hoe dit jou hele gesin of jou besigheid gaan beïnvloed. Só kan dit jou help om jou meer kragtig te beywer vir ʼn beter resultaat.

  • Hou jou emosionele balans

Dis baie belangrik om jou emosies in toom te hou wanneer gesprekke moeilik raak want anders kan jou ego jou maklik laat struikel.

Wat gebeur wanneer jou teëstander ʼn persoonlike belediging na jou slinger? Kenners se raad is dat jy dit moet aflag en vra vir ʼn  meer redelike benadering. Om situasies soos dié verder te ontlont, kan jy vra vir ʼn blaaskans. Onderbreek die gesprek en neem tyd om te hergroepeer en weer jou gemaksone te bereik.

Niks verhinder jou om te besluit dat jy tyd wil hê om na te dink oor wat in die onderhandelinge gesê is of dat jy tyd nodig het om meer navorsing te doen nie. Neem ʼn blaaskans en kom emosioneel sterker en meer voorbereid terug.

  • Hou aan oefen

Die idee dat goeie onderhandelaars so gebore word, is eenvoudig nie waar nie. Onderhandeling is ʼn vaardigheid wat met verloop van tyd ontwikkel kan word. En soos vir die meeste vaardighede, is oefening en terugvoer nodig om dit te vervolmaak.

Bronne

https://www.moneytalkgo.com/how-to-become-a-master-negotiator/

https://www.forbes.com/sites/jennifercohen/2013/12/09/6-effective-ways-to-get-what-you-want-now/?sh=67568e016956

Teken aan

Registreer

Wagwoord vergeet

Kitssoektog